👁️ लायन्स क्लब नागोठणेच्या मोफत मोतिबिंदू शस्त्रक्रिया शिबिराला उत्स्फूर्त प्रतिसाद

👁️ लायन्स क्लब नागोठणेच्या मोफत मोतिबिंदू शस्त्रक्रिया शिबिराला उत्स्फूर्त प्रतिसाद

६६ रुग्णांची नेत्रतपासणी; १८ जणांवर मोतिबिंदू शस्त्रक्रियेसाठी पनवेलला रवाना

नागोठणे, रायगड (शामकांत नेरपगार) : लायन्स क्लब नागोठणे आयोजित मोफत मोतिबिंदू शस्त्रक्रिया शिबिराला नागरिकांचा उत्स्फूर्त प्रतिसाद मिळाला. आर. झुनझुनवाला शंकरा आय हॉस्पिटल, न्यू पनवेल यांच्या सहकार्याने तसेच स्व. शंकरलाल मोदी व स्व. श्रीमती तोफीबाई शंकरलाल मोदी यांच्या स्मरणार्थ त्यांचे सुपुत्र रतनशेठ मोदी यांच्या सौजन्याने बुधवार, दि. २ सप्टेंबर २०२६ रोजी स्व. बाळासाहेब ठाकरे बालोद्यान, नागोठणे येथे हे शिबिर आयोजित करण्यात आले होते.

या शिबिरात एकूण ६६ रुग्णांची नेत्रतपासणी करण्यात आली. तपासणीदरम्यान १८ रुग्णांना मोतिबिंदू असल्याचे निदर्शनास आले. या रुग्णांना पुढील उपचार व मोतिबिंदू शस्त्रक्रियेसाठी तातडीने पनवेल येथील रुग्णालयात नेण्यात आले.

रतनशेठ मोदी यांच्या हस्ते उद्घाटन

शिबिराचे उद्घाटन नागोठण्यातील दानशूर व प्रतिष्ठित व्यापारी रतनशेठ मोदी यांच्या हस्ते करण्यात आले. यावेळी मनोगत व्यक्त करताना ते म्हणाले की, गेल्या दोन वर्षांपासून अशा प्रकारची समाजसेवा करण्याची इच्छा होती. माझी आई याच गोकुळाष्टमीच्या काळात देवाघरी गेली. त्यामुळे यापुढे दरवर्षी गोकुळाष्टमीच्या दरम्यान होणारे हे शिबिर माझ्या सौजन्याने आयोजित करण्यात यावे. समाजसेवा करण्याची संधी मिळत असेल, तर स्वतःला पुण्यवान समजेन, अशी भावना त्यांनी व्यक्त केली.

यावेळी चार्टर्ड प्रेसिडेंट लायन प्रकाश जैन यांनी रतनशेठ मोदी यांच्या बालपणापासूनच्या दानशूर स्वभावाची व समाजसेवेची माहिती उपस्थितांना दिली.

लायन डॉ. अनिल गिते यांनी डोळ्यांची योग्य काळजी कशी घ्यावी व डोळ्यांच्या आरोग्याचे महत्त्व याबाबत मार्गदर्शन केले.

‘रुग्णांची सेवा म्हणजे आई-वडिलांची सेवा’

अध्यक्षीय भाषणात लायन्स क्लब नागोठणेचे अध्यक्ष लायन विलास चौलकर यांनी क्लबच्या विविध समाजोपयोगी उपक्रमांचा आढावा घेतला. अत्यंत व्यस्त जीवनक्रमातून वेळ काढून लायन्स क्लबचे सभासद ही सेवा देत असून, यातून स्वतःच्या आई-वडिलांची सेवा केल्याचे समाधान मिळते, असे त्यांनी सांगितले.

तसेच प्रत्येक रुग्णाने आपल्या परिचयातील किमान दहा व्यक्तींना या शिबिराची माहिती द्यावी, असे आवाहन त्यांनी केले. प्रत्येक महिन्याच्या पहिल्या बुधवारी हे मोफत नेत्रतपासणी व मोतिबिंदू शिबिर आयोजित केले जाते, अशी माहितीही त्यांनी दिली.

या प्रसंगी अध्यक्ष लायन विलास चौलकर, लायन प्रकाश जैन, लायन यशवंत चित्रे, लायन सुधाकर जवके, लायन डॉ. अनिल गिते, लायन विवेक सुभेकर, लायन विजय शहासने, लायन दौलतराम मोदी, लायन सुनील कुथे, लायन सखाराम ताडकर, लायन रतन हेंडे, लायन विद्या म्हात्रे, लायन दीपक लोणारी, लायन अनुराधा शहासने, मोहन म्हात्रे यांच्यासह मोठ्या संख्येने रुग्ण व नागरिक उपस्थित होते.

कार्यक्रमाचे सूत्रसंचालन एमजेएफ लायन विवेक सुभेकर यांनी केले, तर आभार प्रदर्शन लायन विजय शहासने यांनी केले.

संपादक: श्री. शामकांत बाबुराव नेरपगार