🚨 ब्रेकिंग न्यूज 🚨 रोहा रेल्वे फाटकात पिकअपचा अपघात; ढिसाळ व्यवस्थापनामुळे वाहतुकीचा बोजवारा

🚨 ब्रेकिंग न्यूज 🚨

रोहा रेल्वे फाटकात पिकअपचा अपघात; ढिसाळ व्यवस्थापनामुळे वाहतुकीचा बोजवारा

वाकणनाका (सुनिल कोकळे) दि. १० एप्रिल — रोहा-नागोठणे मार्गावरील रोहा रेल्वे फाटकाजवळ आज पहाटेच्या सुमारास एक पिकअप टेम्पो (क्रमांक: MH06 CP 2423) अपघातग्रस्त झाला. वांगणी येथील शिर्के पोल्ट्री फार्मचा हा टेम्पो ब्रॉयलर कोंबड्यांनी भरलेला असताना रोहाकडे येत होता.

सदर ठिकाणी सुरू असलेल्या उड्डाणपुलाच्या कामामुळे रस्त्याची दुरवस्था झाली असून, खडीचा व उखडलेला रस्ता, तसेच सुरू असलेले खोदकाम यामुळे टेम्पो रस्त्यालगतच्या खड्यात कलंडला. या अपघातात वाहनाचे मोठे नुकसान झाले असून माल पोहोचण्यात उशीर झाल्याने व्यापाऱ्यांना आर्थिक फटका बसला आहे.

दरम्यान, रोहा रेल्वे फाटक सततच्या रेल्वे वाहतुकीमुळे वारंवार बंद होत असल्याने येथे नेहमीच वाहतूक कोंडी निर्माण होते. गेल्या चार वर्षांपासून सुरू असलेल्या उड्डाणपुलाच्या संथ गतीच्या कामामुळे नागरिकांना त्रास सहन करावा लागत आहे.

कोट्यवधी रुपये खर्चाच्या या प्रकल्पादरम्यान पर्यायी रस्ता उपलब्ध करून देण्यात प्रशासन अपयशी ठरल्याची टीका होत आहे. तसेच पुलावरील बांधकाम साहित्य खाली पडून जीवितहानी होण्याची शक्यता नाकारता येत नाही परिणामी ही शक्यता लक्षात घेता येथील प्रवास अधिक धोकादायक बनला आहे. त्यामुळे स्थानिक नागरिकांकडून तात्काळ उपाययोजना करण्याची मागणी होत आहे.

संपादक: श्री. शामकांत बाबुराव नेरपगार