🟠 किशोर जैन मित्र मंडळाच्या दहीहंडीचा मान ‘जय हनुमान’ गोविंदा पथक आमडोशीला! सात थरांची दिमाखदार सलामी; ५५ हजार ५५५ रुपयांचे रोख पारितोषिक व आकर्षक चषक देऊन विजेत्यांचा गौरव

🟠 किशोर जैन मित्र मंडळाच्या दहीहंडीचा मान ‘जय हनुमान’ गोविंदा पथक आमडोशीला!

सात थरांची दिमाखदार सलामी; ५५ हजार ५५५ रुपयांचे रोख पारितोषिक व आकर्षक चषक देऊन विजेत्यांचा गौरव

नागोठणे, रायगड (शामकांत नेरपगार) : किशोरशेठ जैन मित्र मंडळाच्या वतीने नागोठण्यातील छत्रपती शिवाजी महाराज चौकात आयोजित करण्यात आलेल्या १६ व्या भव्य दहीहंडी उत्सवात आमडोशी येथील जय हनुमान गोविंदा पथकाने सात थरांची दिमाखदार सलामी देत दहीहंडी फोडण्याचा मान पटकावला. यानिमित्ताने गोविंदा पथकाने जल्लोष करत आपला आनंद साजरा केला.

विजेत्या जय हनुमान गोविंदा पथक आमडोशी यांना ५५ हजार ५५५ रुपयांचे रोख पारितोषिक तसेच गदा असलेला आकर्षक चषक प्रदान करून गौरविण्यात आले.

राष्ट्रवादी काँग्रेसचे नेते किशोरभाई जैन यांच्या प्रमुख उपस्थितीत या भव्य दहीहंडी सोहळ्याचे आयोजन करण्यात आले होते. यावेळी राष्ट्रवादी काँग्रेसचे विभागीय नेते नरेंद्रशेठ जैन, दिलीपभाई टके, शिवरामभाऊ शिंदे, विलास चौलकर, नागोठण्याच्या सरपंच सुप्रियाताई महाडिक, नागोठणे पोलीस ठाण्याचे प्रभारी अधिकारी सपोनि रविंद्र पारखे, विभागीय अध्यक्ष संतोषभाई कोळी, शहर अध्यक्ष बाळासाहेब टके, तसेच संजय भोसले, प्रकाशशेठ जैन, संजय महाडिक, हरेश टके, बिपीन सोष्टे, मंगेश तेरडे, अतुल काळे, अनिल महाडिक, राजू टेमकर, चेतन टके, ध्रुव सोष्टे, केतन भोय, पंकज टके आदी मान्यवर उपस्थित होते.

दहीहंडी महोत्सवाचे अध्यक्ष ॲड. रमेश जाधव, कार्यवाहक मनोज टके, जितेंद्र जाधव, धनंजय जगताप, ॲड. प्रकाश कांबळे, खजिनदार घनश्याम ताडकर यांच्यासह महोत्सव समितीचे पदाधिकारी, राष्ट्रवादी काँग्रेसचे पदाधिकारी व कार्यकर्ते, ग्रामपंचायत सदस्य तसेच नागोठणे पंचक्रोशीतील नागरिक मोठ्या संख्येने उपस्थित होते.

🏆 पाच थरांची सलामी देणाऱ्या पथकांचा गौरव

या दहीहंडी उत्सवात श्री जोगेश्वरी नगर गोविंदा पथक नागोठणे, श्री चौंडेश्वरी माता गोविंदा पथक वरवठणे, जय हनुमान गोविंदा पथक आमडोशी, श्री बापदेव गोविंदा पथक वणी आणि श्री जाखमाता नवतरुण गोविंदा पथक वेलशेत या पथकांनी पाच थरांची सलामी दिली. या सर्व पथकांना प्रत्येकी २ हजार ५२५ रुपयांचे रोख पारितोषिक व चषक देऊन सन्मानित करण्यात आले.

🎤 गीत-संगीत व नृत्याने दहीहंडीला रंगत

संपूर्ण दहीहंडी सोहळ्यादरम्यान अलिबाग येथील गायक महेश पाटील, शलाका पंडित तसेच ‘फनी गेम’ फेम विनोद नाईक यांनी आपल्या कलेतून उपस्थितांचे मनोरंजन केले. पाली येथील ओम साई डान्स अकॅडमीच्या कलाकारांनी सदाबहार समूह नृत्य सादर केले, तर स्थानिक बालकलाकारांनी वैयक्तिक नृत्य सादर करून कार्यक्रमात रंगत आणली.

छत्रपती शिवाजी महाराज चौक परिसरात नागोठणे पंचक्रोशीतील नागरिकांनी मोठ्या संख्येने गर्दी केल्याने संपूर्ण परिसरात उत्साह आणि आनंदाचे वातावरण निर्माण झाले होते.

या संपूर्ण दहीहंडी सोहळ्याचे सूत्रसंचालन महोत्सव समितीचे कार्यवाहक ॲड. प्रकाश कांबळे यांनी केले.

संपादक: श्री. शामकांत बाबुराव नेरपगार